Оросын түүхэнд ЗХУ ямар байр суурьтай вэ? Зөвлөлт засгийн төр барьсан 74 жил Оросын цэрэг, улс төр, эдийн засгийн хөгжлийн алтан үе байсан уу, аль эсвэл уналт доройтол, уруудал мөхлийн эхлэлийг тавьсан уу? Энэ асуултад хүн бүр өөрийнхөөрөө хариулдаг. Ойрын хэдэн үедээ нэгдсэн нэг үзэлд хүрэхгүй л болов уу. Нийгмийн цөм болж буй өнгөрсөн улирснаа тодотгож, нэгдмэл нэгэн санаагүй байх аваас эргээд манай үндэстэнд аюул занал нүүрлэж, улс үндэстэн ухарч доройтох нигууртай юм. Германы хувьд нацистуудын эрин аюул осол дагуулсан түүхийн хар толбо болсныг үндэстэн даяараа хүлээн зөвшөөрдөг. Тэр тусмаа Гитлер, Германы ажилчдын национал социалист намд талтайгаа олон нийтийн өмнө мэдэгдвэл эрүүгийн хэрэг үүсгэдэг. Францад мөн адил түүхэн чухал асуудлаар нэгдмэл нэгэн үзлийг баримталж, Их Карл, Гэгээн Людвиг, Наполеон, Дэлхийн I дайны маршалуудыг Францын хүн амын 90% нь хүндлэн дээдэлдэг. Гэтэл Орост аливаа түүхэн үйл явдал, түүхэн хүний тухай цаг үргэлж маргаж мэтгэлцдэг. Догшин Иван, Их Пётр, Эрх чөлөөг авчирсан Александр, II Николай, Столыпин, Ленин, Сталиныг ялгаагүй зарим хэсэг нь хүндлэн биширч байхад үлдсэн хэсэг нь үзэн ядаж хорсдог. Энэ нь угтаа Оросын нийгэм эмзэг, өвчтэй байгааг батлан гэрчилнэ. Өвчтэй хүн ард өв соёлоо уламжлан хөгжүүлж, үндэсний эдийн засгаа тэтгэх нь байтугай эгэл жирийн амьдралаар амьдрах боломжгүй. Зөвлөлт хэмээгдсэн эл өвчнөө эдгээх үе нэгэнт ирсэн гэж бодох юм.