Хүний хөгжлийн үзэл баримтлалыг анх эдийн засагч, доктор Махбуб ул Хак үүсгэн боловсруулж, өөрийн хамтран зүтгэгч Нобелийн шагналт, эдийн засагч Амартия Сентэй нэгдэн хүмүүсийн чадавхын талаар, хүмүүсийн амьдралд байх ёстой, хүмүүс хийх боломжтой зүйлсийн талаарх асуудлыг гаргаж тавьсан юм. Өнөөдөр дэлхийн нэрт эрдэмтэд, хөгжлийн бодлог тодорхойлогчид, мэргэжилтнүүд, олон улсын хөгжлийн томоохон байгууллагуудын томъёолон ашиглаж байгаа Хүний хөгжлийн ойлголт, үзэл баримтлал нь эдийн засаг, нийгэм, улс төрийн хөгжлийн бодлогын онол, аргачлал болтлоо хөгжсөөр байна. Өөрөөр хэлбэл, хүний хөгжил нь олон шинжлэх ухаанаас урган гарсан бодитой нэгдмэл ойлголт төдийгүй байнга хувьсан хөгжиж байгаа хөгжлийн загвар юм. Хүний хөгжлийг эрхэмлэх, хүний хөгжлийн үзэл баримтлалыг танин мэдэх үйл ажиллагааг түгээх дэлгэрүүлэх, хөгжлийн асуудлыг тойрсон олон ургальч үзэл бодлуудыг эргэцүүлэн дүгнэх боломжийг энэхүү сурах бичгийн агуулгад багтсан сэдвүүдээр олгохыг зорилоо.