Монгол

Уншигчид та бүхний гар дээр Ургамлын биологийн оршил хэмээх онц сонирхолтой, сайхан ном очиж байна.
Номыг ургамал судлах, ургамлын тухай заахад амьдралынхаа 40 гаруй жилийг зориулсан доктор Кингсли Стерн (1927-2006) бичсэн юм. Тэрээр 15,000 оюутанд хичээл зааж, мянга мянган оюутныг ургамал судлаачийн зам мөрд хөтөлсөн, дэлхийн шилдэг судлаач, эрдэмтэн билээ.&nbsp;
Дэлхийн шилдэг их, дээд сургуулийн сурах бичигт тавигддаг шаардлагыг бүрэн хангасан, мэргэжлийнхэн болон ургамал сонирхогчид, олон нийт гээд бүх хүн уншиж судлах боломжтой энэхүү бүтээлд дэлхий даяарх ургамлын хэрэглээний тухай баялаг жишээ, мэдээллүүд багтсан. Номыг бүтээгчид мэргэжлийн нэр томъёо их хэрэглэхээс зайлсхийн, энгийн, ойлгомжтой бичвэрүүдийг оруулсан нь бүтээлийг алдаршуулахад ихээхэн нөлөөлжээ.
Өнөөдөр дэлхий дээр оршин байгаа амьдралд ургамал болон замаг амин чухал ач холбогдолтой билээ. Тэд дэлхийг хүчилтөрөгч, мөн хоол хүнсээр хангаж, эко систем дэх ус болон бодисын эргэлтэд онцгой үүрэгтэй оролцож, биднийг хувцас хунар, орон байраар хангаж, хүрээлэн буй орчныг үзэмж төгс болгодог. Манай нарны системээс бусад гариг дээр фотосинтезлэгч организм оршин байх аваас түүнээс хамааралтай амьдралын бусад хэлбэр байх боломжтой гэж эрдэмтэд хэлдэг. Ургамал бол амьдралын эх үүсвэр юм.&nbsp;
Уншигчид номын хавтсыг сөхөөд л ургамлын олон зүйлийн зураг, тайлбар, ач тусын талаарх сонирхолтой бичвэрүүдийг харж, өөрийн эрхгүй эргүүлэн лавшруулж харах болно. Биологийг зургаар ойлгуулдаг гэдгийг та энэ номоос мэдэрнэ. Мөн ургамлын хэрэглээ, бохирдол ба дахин боловсруулалт, тасалгааны ургамал, хашааны зүлэгжүүлэлт, хортой болон мансууруулагч ургамал, хүнсний ургамлын шимт чанар, дэлхийн дулаарал, озоны давхаргын нимгэрэлт, хүчлийн бороо, гений инженерчлэл, органик аж ахуйн асуудлууд гээд маш баялаг мэдээллийг авах болно.
Номыг орчуулан хэвлэх эрхийг МУИС Хэвлэлийн газар McGrawHill хэвлэлийн газраас албан ёсоор авч, гэрээ байгуулсан бөгөөд Биологийн тэнхимийн багш нарын баг орчуулсан болно.