Аливаа улстай харилцаагаа хөгжүүлэхийн тулд тухайн орныг сайтар судалж, түүний үндсэн дээр стратеги, бодлогоо боловсрууулдаг жамтай. Дэлхийн их Гүрнүүд болох ОХУ, АНУ, БНХАУ өөр өөрийн монгол судлалын түүхтэй, монгол судлалд оруулсан хувь нэмэр, монгол судлалын төвшин, судалгааны чиг хандлага, үзэл баримтлалаараа ч харилцан адилгүй. Эдүгээ Монгол улс олон оронтой харилцаагаа өргөжүүлэн хөгжүүлж хамтран ажиллах болсон шинэ нөхцөлд тухайн улс орны иргэд, төрийн зүтгэлтэнүүд бидний талаар ямар ойлголт, үзэл баримтлалтай байдгийг мэдэж гэмээн өөрсдийгөө зөвөөр ойлгуулахаас гадна, дэлхийн эрдэмтдийн судалгаа, үнэлэлт, дүгнэлтийг харьцуулан судалж, эрдэм судлалын ажлаа дэлхийн төвшинд гаргах шаардлагатай байна. Уг номонд оросын монгол судлалын анхны байгууллагууд, судалгааны томоохон бүтээлүүд, монгол судлалын өнөөгийн байдал, америкийн монгол судлалын эхлэл, судалгааны төвүүд, тэдний бүтээлүүд, БНХАУ байгуулагдсаны эхэн үед монгол судлалд гарсан өөрчлөлт, Бээжингийн их сургууль, өвөр монголын их сургуулийн монгол судлалын сургууль гэх мэт өргөн хүрээний мэдээ мэдээллийг багтаасан байна.