Дурсамж дуртгалыг янз бүрийн насандаа бичиж, бага нас, идэр үе, ахимаг насны явдал гэхчлэн аль ч үеэ хамруулж болдог. Орчин үеийн залуус ч амьдралынхаа эхний 25 жилийн дурсамжийг бичсэн нь харагдаж байна. Ингээд бодохоор дурсамж бичих насны доод хязгаар “мэдээ орох” буюу өнгөрснөө дурсан санах чадамжтай болж эхлэх насаар зааглагдаж байх шиг.
Харин танд толилуулан буй “Хөсрий нэртийн түүх” намтар, дуртгалын номын зохиогч нас сүүдэр ная гарсан хойноо өнгөрсөн явдлаа нэхэн санаж, хүүрнэсэн хууч юм.
Түүнд хөтөлсөн тэмдэглэл, дүрс болон дуу хураагуурт үлдээсэн материал санаа, тэмдэглэл гэхээр юм ч байсангүй. Гагцхүү цэцэн цэлмэг ой санамж, саруул ухааныхаа орон зайд тодхон үлдсэн дурсамжаа сэргээн хуучилсан нь энэ.
Зохиогч өвөг дээдсийнхээ намтар түүх, өөрийн бага насны дуртгалаараа дамжуулан говь нутгийн хүмүүсийн аж байдал, зан заншил, цагийн ороо бусгаа, хүний чанар, амьдралын үнэнийг элдэв хачиргүй дүрслэн бичсэн байдаг.
Анхны хувилбар нь цөөн хувиар ах дүүсийнхээ хүрээнд тарсан энэ бүтээлийг Төрийн шагналт зохиолч Долгорын Нямаа агсны хийсэн редакци, өмнөтгөлийн хамт шинэчлэн хэвлээд өргөн олон уншигчдад барьж байна.
Энэхүү хоёр дахь хэвлэлтэд шинээр нэлээд олон бичвэр нэмж оруулав. Ингэхдээ зохиогчийн бичлэгийн хэлбэр, өнгө аяс, нутгийн аялга, өвөрмөц хэллэг зэрэг онцлогийг нь хэвээр хадгалан эмхэтгэлээ.
Улс орны түүх бол иргэдийнх нь намтрын нийлбэр байдаг. Өнгөрсөн үеэ тод томруун санан дурсаж тэмдэглэн үлдээсэн мэргэн ухаант өвөг дээдсийн гэрийн шастир, амьдралын намтрын тод жишээ болсон “Хөсрий нэртийн түүх” бол Монгол үндэстний түүхийг тольдох нэгэн баримт юм.