“Хөгжлийн зураглал - 2030” бодлогын баримт бичиг нь “Алсын хараа 2050”, “Улаанбаатар хотыг 2040 он хүртэл хөгжүүлэх ерөнхий төлөвлөгөө”-нд үндэслэн боловсруулагдсан бөгөөд иргэдийн эрүүл мэнд, боловсрол, гэр бүлийн асуудлыг чухалчлан, дүүргийн эдийн засаг, засаглал, төлөвлөлт, ногоон хөгжлийн бодлогыг тодорхойлсон юм.
Бодлогын баримт бичгийн хувьд 2021-2024, 2025-2030 он гэсэн хоёр үе шаттайгаар хэрэгжүүлж, хүний хөгжлийг дэмжсэн, амьдралын таатай орчныг бүрдүүлсэн, бүтээн байгуулалт өрнүүлж, тогтвортой үйлдвэрлэл үйлчилгээ хөгжсөн, өрсөлдөх чадвартай эдийн засаг, арилжааны төв дүүрэг болгон хөгжүүлэх зорилготой.
Дүүргийн хөгжлийг хүн ам, шинжлэх ухаан, судалгаа шинжилгээнд үндэслэн алсыг харж, холыг зорьсон ард иргэдийн амьдралын тулгамдсан асуудлыг шийдсэн төлөвлөлтөөр хангахаар тусгалаа. Баянзүрх дүүрэг тэлэн суурьших боломжтой газар нутаг, өсөн нэмэгдэж буй хүн ам, боловсрол, эрүүл мэнд, худалдаа үйлчилгээний байгууллагуудын төвлөрөл, хотын аялал жуулчлалыг хөгжүүлэх боломжтой байгалийн тогтоц бий.
Бүрэлдэн тогтсон хөгжлийн суурь бүтцэдээ тулгуурлан сайн засаглал, зөв хуваарилалт, оновчтой төлөвлөлт, орчин үеийн шийдэлтэй, эдийн засгийн хувьд бие даасан дүүрэг болгон хөгжүүлэх зорилтын хүрээнд үйл ажиллагаагаа тодорхойлох ажлыг иргэд, олон нийтийн дунд хэлэлцүүлж, мэргэжлийн эрдэмтэн судлаач, экспертүүдийн хамтаар хийж чадлаа.
Тодорхойлсон зураглал, дэвшүүлсэн зорилгоо хэрэгжүүлж, дүүргийн хөгжлийг шинэ түвшинд гарган, иргэндээ ээлтэй, хүн бүрд хүртээмжтэй нийгмийг бий болгохын төлөө бид гар, сэтгэл нэгдэн ажиллаж 2 жил тутамд үнэлэлт, дүгнэлтийг хийх болно.