Монгол

Бүргэдээ суулгасан казах морьтнууд, тэнгэр хоёрын хооронд сүрлэг Алтайн уулс сүндэрлэх цайрах агшин бол гэрэл зургийн урлагт тэр бүр тохиолдохгүй гайхалтай хослол юм. Төв Азийн нүүдэлчин түмний улбаа, монголын казахууд шувуучлах уламжлалт соёлыг өнө эртнээс нааш уламжлалт хэлбэрээр нь хадгалж, эргэх цагийн аяст аж амьдрал, ахуй соёлтойгоо хослуулан тээсээр буй дэлхий дээрх цөөн үндэстний нэг ажээ. Түүхийн эх сурвалжуудад тэмдэглэснээр тэртээ 6000 жилийн өмнөөс шувуугаар ан хийлгэж байсан тухай баримтаас үзэх дор бүргэдийн хэмээх хүн, шувуу хоёрын нөхөрлөл, хүчирхэг жигүүртэн, хүлэг морьдын холбоо, хүсэл, хяслын хязгаар, хүй орчлон хүмүүний хамаарал, хөгшдөө хүндэтгэх адил айл гэрийн бахархалт энэ өвөрмөц зан үйл, ёс уламжлал өнөөг хүртэл хэрхэн хадгалагдан ирэхдээ юу эсийг давж, хэчнээн удмыг дамжиж, хэлбэр, жаягаа гээлгүй тээснийг зөвхөн казах үндэстэн өгүүлэх учир нэн сонирхолтойг мэдүүлэхийг хичээсэн нь энэ биз ээ. Өдгөө манай орны алс баруун хязгаар, Алтай Соёны уулсын дунд 200 гаруйхан бүргэдчин гайхамшигт язгуур соёлоо бодитоор тээж, үе удам, үр хойчдоо өвлүүлсээр амьдран суух юм.. Эрхэм нандин өв соёлоо сурталчлан таниулах үйлст хамтдаа зүтгэж буй уран бүтээлийн хамтрагчид, гэрэл зурагчид бид эртний шувуучлах уламжлалын үргэлжлэл бүргэдийн соёлыг илтгэн харуулсан шилдэг зургуудаа сонгон сойж, тайлбар юугаа бичиж, тоон мэдээллээ тоймлохдоо тэрхүү соёлыг тээгч бүргэдчин казахуудтай ярилцлага дурсамжаар баяжуулан бүтээлээ бадраан, хөгжүүлэхийг хичээснийг учрыг туурвисан номоороо үзүүлэхийг хичээлээ.