Нэг үе оросын түүх бичлэгт тухайн үеийн цаг төр, засаглалын чиг хандлага, үзэл суртал хэт нөлөөлж байснаас үүх түүхээ үнэн бодит байдлаар илэрхийлэх нь ховор байж. Харин Г.Штөклий _“Оросын түүх”_ бүтээлийг бичиж, 1962 онд хэвлүүлсэн нь тэр даруйдаа нийтэд хүрч, эрэлт нь ихсэн, улмаар долоон удаа дахин хэвлэгдсэн байна. Энэ бүтээл нь оросын эртний түүхээс эдүгээ хүртэлх газарзүй, төр улс, шашин шүтлэг, хөгжил дэвшил, бослого тэмцэл, аян дайн, алдар суутнууд гээд өргөн хүрээг хамарч, түүхийн маш нарийн судалгаа, олон жилийн хөдөлмөрийн үр дүнг шингээсэн юм. Мөн XVIII-XIX зуунд тариачин хүнд анги язгуураа сольж амьдрал ахуйгаа сайжруулах боломж байсныг бодитой өгүүлсэн нь оросын ард түмэнг хэн байгаад хэн болсоныг тодорхой харуулах юм. Тиймээс ч энэ ном өрнөдийн уншигчдаас Оросын түүх бичлэгийн хамгийн шилдэг загвар, чиг шугам мөн хэмээх үнэлэлтийг авсан байна. Өрнөдийн улс орныг байлдан дагуулсан энэ бүтээлийг эрхэм та уншин тольдсоноор орос орны ахуй амьдрал, зан заншил, соёл уламжлал зэргийг урьд урьдаас илүү үнэн бодитой танин мэдэж, ойлгож ухаарах болно.