“Зөвхөн Абэгийн бус мөн Япон орны уналт доройтол, сэргэн мандлын тухай-бидний энэ цаг үеийн улс төрд эргэж ирсэн аугаа үйл явдлын түүхийн нэгийг Харрис тун чадварлаг бичжээ. Зохиогч сонирхолтой үйл явдлаар хачирлан, нэвтэрхий дүн шинжилгээ хийж, улс төрийн сурвалжит гэр бүлээс гаралтай Абэ гэгч хэрхэн цаг үетэйгээ тэрслэн байж, орчин үеийн Японы түүхэнд дахин Ерөнхий сайд болохоор зориглон зүтгэж амжилтад хүрснийг бидэнд өгүүлжээ. Харрис Япон улсын өөртөө итгэх итгэл, мөн дэлхий дахинд эзэлбэл зохих байр суурийг сэргээхийн тулд Абэ хэрхэн хориг цээрийг эсэргүүцэн, тогтсон хэв загварыг эвдсэн тухай хүүрнэнэ”.


Удам дамжсан улстөрч гэр бүлээс гаралтай (өвөө нь ерөнхий сайд асан Нобүсүкэ Киши) тэрээр 1993 онд эцгээ залгамжлан Японы парламентад сонгогджээ. Абэ 2002 онд Хойд Солонгост барьцаалагдсан япон иргэдийн асуудлаар хатуу байр суурь баримталж байсныхаа хувьд нэрд гарч, 2003 онд Либерал Ардчилсан Намын ерөнхий нарийн бичгийн даргаар сонгогдсон. 2005 онд Койзүмигийн засгийн газрын хэрэг эрхлэх газрын даргаар ажиллаж байгаад 2006 онд түүнийг залгамжлан намын дарга бөгөөд Япон улсын Ерөнхий сайд болсон (Дэлхийн II дайнаас хойших Японы хамгийн залуу ерөнхий сайд). Гэвч танхимынх нь гишүүд янз бүрийн асуудалд орооцолдсон болон 2007 оны долдугаар сард парламентын дээд танхимд Либерал Ардчилсан Нам олонхын суудлаа алдсантай холбоотойгоор есдүгээр сард албан тушаалаасаа огцорсон. Абэ 2012 оны есдүгээр сард Либерал Ардчилсан Намын даргаар дахин сонгогдож, арван хоёрдугаар сард нам нь парламентын сонгуульд ялалт байгуулснаар хоёр дахь удаагаа (1948 оноос хойш анхны тохиолдол) Япон улсын Ерөнхий сайд болжээ. 2014 ба 2017 оны сонгуулиудад намаа удирдан парламентад олонхын суудал авснаар Японы түүхэн дэх хамгийн олон жил ажилласан ерөнхий сайд болсон. 2020 онд эрүүл мэндийн шалтгаанаар хоёр дахь удаагаа сайн дураараа огцорсон. Консерватив үзэлтэй Абэ Японы цэрэг, зэвсэглэлийн асуудлаарх Үндсэн хуулийн хязгаарлалтыг эргэн харах, олон улсын тавцанд Япон улсын гүйцэтгэх үүргийг нэмэгдүүлэхийн төлөө байж, Хойд Солонгосын эсрэг хатуу байр суурь баримтлан, эдийн засгийн шинэчлэлийг үргэлжлүүлжээ. Тэрээр ерөнхий сайдаар ажиллах хугацаандаа Хятадтай харилцаагаа сайжруулж, боловсролын шинэчлэлийг санаачилжээ. Түүний эдийн засгийн бодлогыг “Абэномикс” гэдэг.