“Ном хэрхэн унших вэ?” хэмээх энэхүү сонгодог бүтээл нь уншигчдад ном унших зөв арга барилыг эзэмшихэд чиглэсэн гарын авлага юм. Анх 1940 онд хэвлэгдмэгцээ бестселлер болж, унших урлагийг шинжлэх ухааны түвшинд авч үзсэн нь түүнийг олон улсын түвшинд хүлээн зөвшөөрөгдөхөд хүргэсэн. 1970-аад онд телевиз, мэдээллийн хэрэгсэл ихэссэн ч хүмүүсийн унших чадвар, боловсролын чанар бодитой ахиагүй байв. Тиймээс зохиогч Мортимэр Адлэр, Чарлз Ван Дорэн нар нийгмийн өөрчлөлт, шинэ үеийн уншигчдын хэрэгцээнд тохируулан энэхүү номоо 1972 онд дахин бичжээ. Ном дөрвөн түвшний уншлагыг тодорхойлж өгдөг: анхан шатны, үзлэгийн, задлан шинжлэх, харьцуулах уншлага. Түүнчлэн шинжлэх ухаан, философи, уран зохиол, сурталчилгаа зэрэг төрөл бүрийн текстийг хэрхэн оновчтой, онцлогт нь тохируулан унших тухай дэлгэрэнгүй тайлбарласан. “Номыг бүхнийг ижил хурдаар биш, өөр өөр хурдаар уншина” гэх ойлголт уг бүтээлийн гол санаа юм. Энэ бол зүгээр нэг унших тухай ном биш, харин уншлагын гүн ухаан, бүтээлч сэтгэлгээний гарын авлага юм. Боловсрол, оюуны өсөлтийг эрэлхийлэгч хэн бүхний ширээний ном гэж хэлж болно.