Хүн өөрийгөө бүрэн танин мэдэж чадвал ямарваа зовлон зүдүүрийг ялан дийлж, өөрийн гэсэн амар амгалан, сэтгэлийн цэнгэлийг эдлэн амьдарч чадна гэдэгт би гүнээ итгэдэг билээ. Иймээс ч би хүчтэй сэтгэлзүйн жагсаалтаа бичиж байхдаа өөрийнхөө муу зуршлуудаас түр холдож үзье гэж бодлоо. Ихэнх сэтгэл засалчид хүмүүст ямар байх талаар зөвлөгөө өгч, юу хийх хэрэгтэйг хэлж өгдөг. Харин би юуг хийх вэ? гэдэгт бус юуг хийхгүй байх вэ гэдэг дээр төвлөрөхөд л бүх зүйл өөрчлөгдсөн юм. Сайн зуршил хэрэгтэй ч өөрийгөө бүрэн дайчлахад саад болдог зүйл бол бидний муу зуршил.
Муу дадал гэдэг бол танаас хэзээд дүүжлэгдэж байх хүнд жингийн туухай л гэсэн үг. Таныг удаашруулж, ядрааж, бухимдуулах болно. Та хэдий хичээл зүтгэл гаргадаг, хэчнээн авьяастай байгаад таныг хойш татдаг ямар нэг бодол, зан ааш, мэдрэмж байдаг бол та өөрийгөө хамаг чадлаараа дайчлах гэж их л зовох болно. Бид ийм зангаасаа болоод л бүгд бурууддаг. Бидэнд хэрэг болно гэж бодсон зүйлээ хийхийн төлөө хамаг чадлаараа хичээдэг боловч хичээл зүтгэлийг маань үр дүнгүй болгоод байдаг муу зүйлсэд анхаарлаа хандуулдаггүй. Тиймээс би Сэтгэлийн их хүчийг бий болгоход тээг садаа болдог 13 муу зуршлын талаар бичсэн билээ. Энэ 13 дадлаас зайлсхийх нь зөвхөн уй гашууг даван туулахад хэрэгтэй юм биш. Энэ дадлуудаас салж чадвал амьдралын их бага ямар ч асуудлыг шийдэхэд шаардагдах хүчтэй сэтгэл зүйтэй болж чадна. Таны амьдралын зорилго юу байлаа ч таны сэтгэл санаа хүчтэй байвал өөрийнхөө бүрэн хүчийг харуулан гайхамшгийг цогцлоож чадна.