Оройн дээд Очирдара, Аврал итгэлт IX Богд багшийн намтрыг монгол хэлнээ орчуулав. Энэ намтрын төвөд эхийг Бэри Агваанригвийдорж ламтан бээр туурвиж 2015 онд хэвлүүлжээ.1635 онд Өндөр гэгээн Занабазар Монгол түмний оройн дээд Очирдара Анхдугаар Богдоор тодорсноос инагш IX дүрийн хувилгаан нь Жамбалнамдолчойжижанцан гэгээнтэн юм.Аврал итгэлт IX Богд багш 1933 онд Төвөдийн Лхас хотноо мэндэлж, долоон сүүдэртэйд нь Далай ламын орлооч Раадэн ринбүүчи Халх XIII Богд Жавзандамбын хойд дүрээр тодруулжээ. Бага балчир наснаасаа Брайбун хийдэд шавилж чойрын номд суралцан ном эрдмийн үйлээ эхэлсэн бөгөөд маш их хатуу цаг үеийг туулан Бурханы шашны үйл хэргээ үргэлжлүүлсэн бөгөөд ялангуяа монголчуудын хувьд өмнөх Богд дээдсийн үйлс зохионгуйн алтан залгамжыг тасдал үгүй өнөө цагт залгуулж өгсөн хамгийн зарлигийн их ачтан дээдэс болой.

1999 онд Монгол орноо анх морилсон бөгөөд 2010 оноос дахин Монгол орноо морилж шашин номын үйл хэргээ туурвиж 2011 онд Монголын Бурханы шашны тэргүүнээр өргөмжлөгдсөн.