Монгол төрийн ерөнхий сайдын албанд хоёронтоо сонгогдон ажиллаж, гурван төрийн нүүр үзсэн Жалханз хутагтын хувилгаан Ц.Дамдинбазар бол, 'Тулгар төрийг байгуулж, түвшинээр иргэнийг засаж, шашин, төрийг бататгаж, үнэн журмыг баримтлана' хэмээсэн өөрийн үзэл санаа, амьдрал, үйл ажиллагааныхаа зарчимдаа чин үнэнч байж, ХХ зууны эхэнд тохиосон хоёр их хувьсгалын үйлсэд Монгол орноо гэсэн хоёргүй сэтгэлээр зүтгэсэн, төр, шашны тулхтай зүтгэлтэн байв. Түүний намтар түүхийн судалгаанд ээдрээ бүхий, олон учигтай асуудлууд цөөнгүй. 1911 оны хувьсгал дахь оролцоо, Ховдыг чөлөөлсөн түүхийн асуудал, Монгол улсын автономийг устгасан хийгээд Жалханз хутагтын хайсан тусгаар тогтнолын шинэ гарц, Ардын төрийн ерөнхий сайдаар ажилласан зэргийг дурьдаж болно.