МУИС-ийн Монгол судлалын хүрээлэн, Түүхийн тэнхим, Стэп паблишн (Steppe publishing) компанийн Монгол судлалыг хөгжүүлэх хамтын ажиллагааны хүрээнд “Монголын эзэнт гүрний түүх” таван боть төслийг 2018-2019 онд хэрэгжүүлсэн байна. “Монголын эзэнт гүрний түүх” таван боть бүтээлд Их Монгол улс, Их Юань хэмээх Их Монгол Улс, Зүчийн улс, Цагадайн улс, Ил хаант улсын улс төр, нийгмийн байгуулал, эдийн засаг, соёлын түүхийг араб, перс, цагадай, хятад, орос зэрэг олон хэлний сурвалж судалгааны бүтээлд тулгуурлан судалж, цогцоор нь нэгтгэн харуулахыг зорьсон байна. “ **Их Монгол улс** ” тэргүүн ботийг доктор Б.Батсүрэн, доктор П.Дэлгэржаргал, доктор У.Эрдэнэбат: “ **Их** **Юань хэмээх Их Монгол улс** ” дэд ботийг доктор Д.Идэр, магистр Ч.Содбилэг, доктор Б.Чинзориг: “ **Зүчийн улс** ” гутгаар ботийг доктор Ж.Гэрэлбадрах, доктор Б.Чинзориг, доктор Д.Өлзийбаатар: “ **Цагадайн улс** ” дөтгөөр ботийг доктор Д.Анхбаяр, доктор Р.Мөнхтулга: “ **Ил хаант улс** ” тавдугаар ботийг доктор Д.Анхбаяр нар бичжээ.