Монголын сэтгүүл зүйн судлал үндэс сууриа тавьснаас хойш тавь гаруй жил өнгөрчээ. Энэ бол бүхэл бүтэн салбар шинжлэх ухааны хөгжил төлөвшлийн хувьд, бас нийгэм-хүмүүнлэгийн бусад салбартай харьцуулахад харьцангуй бага хугацаа юм. Хэдийгээр тийм боловч монголын сэтгүүл зүй судлал, шүүмжлэл ОНМХ-ийн бүх салбар, чиглэлд судалгааны багагүй туршлага хуримтлуулж, өөрийн гэсэн apгa зүй, аргуудтай, судлаач боловсон хүчинтэй болж чадсан. 1960-аад оны эхээр Монголын тогтмол хэвлэлийн түүхийг ул суурьтай судалж, анхны томоохон нэг сэдэвт бүтээл болох 'Монгол тогтмол хэвлэлийн түүхэн тэмдэглэл'-ийг олон түмний хүртээл болгосон нэрт сэтгүүл зүй судлаач, шинжлэх ухааны доктор Г.Дэлэгийн үйл хэргийг үргэлжлүүлж, сэтгүүл зүйн янз бүрийн чиглэлээр судалгаа хийж, сэтгүүл зүйн судлал, шүүмжлэлийн хөгжилд үнэтэй хувь нэмэр оруулж буй цөөнгүй судлаач төрөн гарчээ. Өнөөдөр манай сэтгүүл зүй судлаачид олон нийтийн мэдээллийн аль ч хэрэгсэл, сэтгүүл зүйн аль ч чиглэлийг хөндсөн олон арван бүтээл туурвиж, эрдмийн зэрэг хамгаалж, шинэлэг санал эөвлөмж дэвшүүлж, үнэ цэнэтэй үнэлэлт, дүгнэлт өгч байгаа нь нэн сайшаалтай юм.