Английн шүүмжлэлт реализмын хамгийн том төлөөлөгч, нийгмийн сэдэвт олон романаараа дэлхийд алдаршсан, зохиолч Чарльз Диккенс 1812 оны 2-р сарын 7-нд Ландпортод мэндэлжээ. Усан боомтын доод албаны түшмэлийн хүү тэрээр бага наснаасаа дутагдах гачигдахын зовлонг амсаж, эцэг нь өр төлбөрөөсөө болж шоронд орсон тул арван настайгаасаа хар бор ажил хийж явжээ. Сүүлдээ сонины сурвалжлагч, Английн парламентад бичээчээр ажиллаж байсан нь түүний хувьд нэг ёсны их сургууль болж, хожим зохиолч болоход нь нөлөөлсөн байна. Түүний үзэл бодол төлөвшихөд Англид гарсан чартистуудын хөдөлгөөн, 1840-өөд оны Европ дахиныг хамарсан чөлөөлөх хөдөлгөөн эерэг нөлөө үзүүлжээ. Диккенс бас жүжиглэх авьяастай байсан тул сонирхогчдын театрын тоглолтод тогтмол оролцож, завсар чөлөөнд нь өөрийнхөө зохиолоос жүжиглэн уншдаг байсан аж. Түүний анхны томоохон бүтээл нь 'Пиквикийн клубын өөд болохын өмнөх тэмдэглэл' '1837' хэмээх шог роман юм. Үүний араас этгээд адал явдлын тухай өгүүлсэн 'Оливер Твист' '1838', 'Николас Никелбийн амьдрал, адал явдал' '1839', 'Мартин Чезлвит' '1844' романууд, нийгмийн олон асуудлыг хурцаар өгүүлсэн 'Домби, хүү хоёр' '1848', 'Хүйтэн байшин' '1853', 'Бэрх үе' '1854', 'Бяцхан Доррит', гэмт хэрэг, мөрдөгчийн адал явдлыг харуулсан 'Их хүлээлт' '1861', 'Бид бүгдийн найз' '1865' зэрэг нийгэм-сэтгэхүйн романууд, 'Хуучны эд юмсын дэлгүүр' '1841', 'Христийн мэндэлсэн өдрийн туужууд' '1843-1846' зэрэг сургамжийн чанартай сентиментал роман, 'Барнаби Раж' '1841', 'Хоёр хотын тухай тууж' '1859' түүхэн роман, 'Дэвид Копперфилд' '1850' хүмүүжлийн роман цувран гарчээ. Диккенс уран бүтээлийнхээ гучаад жилд арван таван роман, хэд хэдэн тууж, жүжиг, найруулал ба өгүүллэгийн түүвэр, утга зохиол, уран сайхны хоёр сэтгүүл эрхлэн гаргаж байжээ. Цаг үеийнхээ гол гол хэрэг явдлыг 'хуучин англи' уламжлалаар уран элэглэл, хошигнол, заримдаа бүр энгийн шог, егөөдөл оруулан үнэн зөв дүрсэлж, бурангуй явдал, олох идэхийн шунал, хүчирхийлэл, шүүх хурлын булхайг уудлан илчилж, нийгмийн доод түвшинд байсан жирийн олныг өмгөөлж хамгаалсан түүний зохиол бүтээл Английн уран зохиолын түүхэнд нэг чухал үе болон үлдсэн юм.