Ямар нэг хэлийг сурахаар анх зориглон шийдсэн үедээ "Энэ хэлийг сурчихсан байхад надад ийм ашиг тустай" гэх бодол танд төрж байсан уу? Ирээдүйд ирж болох үр өгөөжийн төлөө, өөрөөр хэлбэл, тухайн хэлээрээ ойлголцох, цаашлаад тэр улсыг таньж мэдэх хүсэл эрмэлзлэлтэй огтхон ч хамааралгүй зорилготойгоор та хэл сурах аяллаа эхэлчихсэн юм биш биз. 

Дээр дурдагдсан ашиг тус гэдэгт карьераа ахиулах, хүмүүст сэтгэгдэл төрүүлэх, нэр хүндээ өсгөх, шалгалтад тэнцэх, хүслийн жагсаалтаа биелүүлэх зэрэг хэлийг ашиглаж сурахтай төдийлөн холбоотой бус ямарваа нэгэн зорилтыг биелүүлэхэд чиглэсэн шалтгаанууд багтах бөгөөд эдгээрийг гадаад сэдэл хэмээн нэрлэдэг. Тэгээд ч хэл сурч байгаа хүмүүст дотоод бус гадаад сэдэл давамгайлах хандлагатай байх нь элбэг.  Чухамдаа хэл сурахад чин сэтгэлээсээ дурлан улайрдаггүй хэрнээ тухайн хэлийг сурснаар хожим гарч болох үр өгөөжид хэт найдлага тавих явдал түгээмэл байдаг. 

Тиймээс хэзээ нэгэн цагт танд ирэх үр өгөөжид төвлөрөхөө түр азнаад, бусдын дотоод ертөнцийг нээж өөрийгөө бүрэн дүүрэн илэрхийлэхэд үзэж буй хэл тань гүүр болно гэдэг талаас нь харж суралцаарай.  Энэ бол таны хэл сурах явцыг илүү хөгжилтэй, илүү хурдтай,  илүү үр дүнтэй болгох шидэт орц юм шүү.