Монголчууд эрт цагаас Хүннү гүрний үеэс нутаг дэвсгэрээ зурдаг байсан ажээ. Их Монгол улс, Монголын эзэнт гүрний цагт нутгийн зураг хийж байсан мэдээ бий. "Дөчин, Дөрвөн хоёр"-ын Монгол улсын үеэс үлдсэн нутгийн зургийн дурсгал бол Зүүнгарын улсын нутгийн 2 зураг юм. XVII-XX зууны үеэс нутгийн зураг явдал эрс нэмэгдсэн байна. Тэр цагийн аймаг, хошуу, өртөө, харуул бүр нутгийн зураг зурж, цэс үйлдэх болсон байна. Нутгийн зураг тусгай журамтай байжээ. Монгол нутгийн зургийг гараар үйлддэг байв. Цаас, даавуун дээр хар цагаанаар эсвэл өнгө ялгаж зурна. Орчин цагийн масштабын оронд дөрвөлжин татсан хэмжээсний тор ашиглана. Уул, нуруу, овоо, гол, мөрөн, булаг, худаг, говь, элс, зам, өртөө, харуулыг тэмдэглэдэг тусгай тэмдэглэгээтэй байв. Нутгийн зураг үйлдэхдээ зүг чигийн хүрд ашиглаж байжээ. Монгол нутгийн зурагт уртын хэмжүүр хэрэглэдэг нь ямх, тохой, алд, нум, хувь, газар юм. Монгол нутгийн зураг зөвхөн Монгол улсад төдийгүй ОХУ, Япон, Хятад, ХБНГУ, Польш зэрэг улсын архив, номын санд хадгалагдаж байна.