Төмөрцэрэнгийн энэ их бүтээлийг уудалж үзвэл хэд хэдэн төрөлд ялган ангилж болохоор байна. Гадаад дотоодод бичиж хэвлүүлсэн өгүүллүүдийн олонх нь монгол хэл шинжлэлийн чиглэлээр бичсэн байх бөгөөд дараах 7 чиглэлээр төрөлжүүлж "Монгол хэл шинжлэлийн өгүүллүүд" хэмээх энэхүү түүвэрт нь багтаалаа.

Үүнд: Хэл шинжлэлийн онол, арга зүй, дотоод гадаад дахь монгол хэлний шинжлэлийн судалгааны байдал, монгол хэлний үгийн сангийн судлал, монгол хэлний нутгийн аялгуу, угсаа хэл шинжлэл, эх бичиг ба үсэг бичиг судлал, утга зохиол, "Монголын нууц товчоон" судлал, монгол хэлний авиа зүй, монгол хэлний хэл зүй, үгийн бүтэц судлал, монгол хэлний нэр зүй, нэр томьёо судлал, монгол хэлний найруулга зүй ба хэлний соёл, хэм хэмжээ, дотоод гадаадын монголч эрдэмтдийн тухай тэмдэглэл, нийтлэл, шүүмж мөн монгол хэл шинжлэлийн ном зүй, хэвлэл мэдээлэл зэрэг бүтээлүүд болно.

Түүний бичсэн бүтээлүүдийг дээрх загварын дагуу багцлан дүгнэж үзвэл монгол хэл судлал, аливаа хэл шинжлэлийн онол, арга зүйг нарийн үзэж судлан, хэлний гарал үүсэл, хөгжлийн онцлог, шинэ чиг хандлагыг нарийн ажиглаж, монголын болон гадаадын хэл шинжлэлийн онолын судалгааг жишээ баримттайгаар цаг алдалгүй бичиж, монгол хэл шинжлэлийн ололт амжилтыг эрдэмтэн судлаач, оюунтан суралцагч нарт хүргэж байжээ.