Үнэг, зараа, чоно гурав
Эрт урьдын цагт нэг нутагт саарал чоно, зальт шар үнэг, ухаант зараа гурав хамт амьдарч байжээ.
Гэтэл нэгэн өдөр гурвуул хамт тэнэж яваад ганц чавга олжээ.
Олсон ганц чавгаа хэн нь идэхийг шийдхээр хэлэлцэж гэнэ.
Чоно: -Архинд хамгийн амархан согтдог маань чавгаа идье гэж санал болгов. Энэ саналыг зальт үнэг, ухаант зараа хоёр зөвшөөрөв гэнэ.
Тэгээд саарал чоно яаран сандран хэлсэн нь: -Би архийг амсаад л согтдог гэв.
Зальт үнэг сүүлээ шарвагнуулан: -Харин би архийг дөнгөж үнэрлээд л согтдог гэж хэлэв гэнэ.
Тэгэхэд ухаант зараа хожуул дээр гарч зогсоод: -Би лав сонсохоороо согтдог гээд гуйвж, дайвж байж гэнэ.
Ингээд зараа ганцаараа нөгөөх чавгаа идэхээр болжээ. Чавгыг зараа ганцаар идэх болсонд заль шар үнэг их л атаархаж гэнэ.
Ингээд зальт шар үнэг уралдвал зараа яасан ч намайг гүйцэж чадахгүй гэж дотроо бодоод: -Уралдаад хэн түрүүлсэн маань идье гэжээ. Энэ саналыг зараа, чоно хоёр зөвшөөрч уралдахаар болов.
Уралдаан эхэлхэд зараа үнэгний сүүлнээс зүүгдээд авч гэнэ.
Үнэг хар эрчээрээ давхиж давхиж ирээд өөрийгөө түрүүлсэн гэж бодоод эргэж хартал зараа ард нь аль хэзээний ирсэн царайтай зогсоод: -Чи чинь дөнгөж одоо л ирж байгаа нь энэ үү? гэж хэлжээ.
Ингээд ухаант зараа тааваараа сууж чавгаа идэж гэнэ.