1972 онд Дархан хотод төрсөн. Монгол судлаач, сэтгүүлч мэргэжилтэй. 1994-1996 онд төрийн төв хэвлэл 'Ардын эрх' сонинд сурвалжлагч, 1997-1999 онд чөлөөт хэвлэл 'Өчигдөр' сонинд ерөнхий редактор, орлогч эрхлэгч, 2000 оноос хойш чөлөөт уран бүтээлч болж, урлаг утга зохиол, гоо зүй, танин мэдэхүйн чиглэлийн 100 орчим номын ('Шинэ үеийн номын сан' цуврал 10 боть, 'Дэлхийн сонгодог утга зохиолын 50 боть' цувралын) редактораар ажиллажээ. Яруу найргийн төрлөөр: 1995 онд 'Тэргүүн бүлэг' 2000 онд Тэнгэрт ургадаг модод' 2002 онд 'Эрх чөлөөтэй байхын урлаг' 2004 онд 'Ганцаардлын дасгал' 2007 онд 'Миний гунигийн түүх' 2009 онд 'Төсөөллийн өрөөнд' 2015 онд 'Толинд туссан Будда' Хүүрнэл зохиолын төрлөөр: 2004 онд 'Нүдний шилэнд үлдсэн зургууд' 2012 онд 'Үзэхийн хязгаар' 2013 онд 'Хотын үлгэрүүд' хэмээх номууд бичиж олны хүртээл болгосон. 2005-2006 онд 'Монголын сонгомол яруу найраг', 'Монголын сонгомол тууж', 'Монголын сонгомол өгүүллэг' хэмээх үндэсний утга зохиолын цуврал антологийг Г.Аюурзанын хамтаар эрхлэн гаргасан. 2002 онд Монголын Зохиолчдын Эвлэлийн болон шилдэг бүтээлийн 'Алтан өд' шагнал, 2009 онд Алтан гадас одонгоор шагнуулсан. 2009 онд яруу найргийн шилмэл ном нь солонгос хэлнээ хөрвүүлэгдэж Сөүл хотноо хэвлэгдсэн бөгөөд гадаадын 10 орчим орны утга зохиолын сэтгүүл, сонин, антологид өгүүллэг, шүлгүүдээс нь хэвлэгдэн англи, орос, хятад, солонгос, япон, мажаар, серб, румын, вьетнам, польш хэлнээ орчуулагдсан. БНСУ-д төвтэй Азийн Яруу Найргийн Холбооноос эрхлэн гаргадаг утга зохиолын сэтгүүлийн олон улсын зөвлөлийн гишүүнээр 2005 оноос хойш ажиллаж байна.