"Орчин цагийн монгол хэл” (I, II боть) номыг МУБИС-ийн НХУС-ийн монгол хэлний тэнхимийн багш нар хамтран бичиж гүйцэтгэсэн билээ. Энэхүү номын 1 дүгээр ботид “Монгол хэлний хөгжлийн товч түүх", "Монголчуудын бичиг үсгийн түүхийн тойм”, “Авиа зүй”, “Нутгийн аялгуу судлал”, “Зөв бичих, зөв дуудах зүй”, “Найруулга зүй” гэсэн хэсэг, 2 дугаар ботид “Үг зүй”, “Өгүүлбэр зүй”, “Үгийн сан судлал”, Эх судлал” гэсэн хэсгийг багтааж оруулсан билээ.

Бид энэ удаад оюутан суралцагч, мэргэжлийн багш нарт зориулан “Орчин цагийн монгол хэл" номын "Мэдлэг чадварын сорилго"-ыг зохиогчийн багаар хамтран боловсрууллаа. Мэдлэг чадварын сорилго нь “Эх судлал”, “Өгүүлбэр судлал", "Үг зүй”, “Найруулга зүй”, “Авиа зүй”, “Зөв бичих, зөв дуудах зүй”, “Үгийн сан, утга судлал”, “Нутгийн аялгуу судлал", "Монгол хэлний хэлц нэгж”, “Монголчуудын бичиг үсгийн түүх”, “Үндэсний бичиг” гэсэн 11 хэсэгтэй бөгөөд тус бүрийн хариуг боловсруулж хавсаргав. ЕБС-ийн мэргэжлийн багш нар, оюутан суралцагчийн монгол хэлний хичээлийн хэрэглээ, сургалтын шаардлагад нийцүүлэн “Монгол хэлний хэлц нэгж”, “Үндэсний бичиг” гэсэн хэсгийг нэмж боловсрууллаа.