Монголчууд тусгаар тогтнолоо алдаж, Манжийн эрхшээл дор оршиж байсан XVII-XX зууны эхэн үед Монголын түүх бичлэгийн уламжлал тасарсангүй, үргэлжилж шинэ өнгө төрхтэй болон өөрчлөгджээ. Юуны өмнө, Монголын түүхийн утга зохиолд Манжийн засаглалыг зөвшөөрөн дагасан улс төрийн үзэл баримтлал нэгэнт тогтсон байна. Мөн өмнөх үеэс эхэлсэн Монголын хаадын гарал угсааг Энэтхэг, Төвдөөс гаралтай хэмээн гажуудуулан үздэг бурханы шашинт утга зохиолын нөлөө улам бүр ихсэж, улмаар голлох байр суурьтай болжээ. Тухайн үеийн Монголын түүхийн утга зохиолд бий болсон өөр нэг шинэ зүйл бол харь төвд хэлээр зохиол бүтээлээ туурвих болсон явдал юм. Энэ хугацаанд Монголын өнцөг булан бүрт их, бага хэмжээний түүхийн зохиол олноор бичигдэн гарчээ. Тэдгээрт Манжийн эрх нөлөөг хүлээн зөвшөөрсөн, зарим тохиолдолд Манжийн хаадын бодлого, үйл ажиллагааг магтан дуулсан байдаг ч гэсэн бусдын эрхшээл дор байсан тэр цаг үед эх түүхээ марталгүй мэдэж байхын чухлыг ойлгож, тасалдуулахгүй үргэлжлүүлсээр байсны тод үлгэр дууриал болж байв. Тэдгээр зохиолын нэг бол Галдан туслагчийн зохиосон 'Эрдэнийн эрх' юм.