Биологийн төрөл зүйл хүний үйл ажиллагааны сөрөг нөлөөгөөр хумигдсаар байгаа бодит байдал дэлхий дахины олон улс орны эрдэмтэд, судлаачдын анхааралд аль хэдий нь өртсөн явдал шинжлэх ухаан, танин мэдэхуй, практик үйлсийн аль алинд нь нааштай үр дүн өгсөөр байна. Гэсэн ч асуудал бүрэн шийдвэрлэгдээгүй санах сэрэх, бодох, хийж бүтээх ажил хэрэг дуусашгуй хэвээр байгаа нь ойлгомжтой. Тийм зүйлсийн нэгэнд Монголд тахь сэргээн нутагшуулах үйл ажиллагаа зүй ёсоор орно. Тахь хэмээх биологийн нэгэн зүйл амьтны гарал үүсэл, хувьсал хөгжил, амьдралын орчин нөхцөл, өсөлт үржил, хорогдол мөхөл, нөхөн сэргээлт шинжлэх ухааны сонирхлыг XIX зууны сүүлчийн хагасаас эхлэн илүүтэй татаж эхэлсэн нь уг судалгааны ажлын түүх биологийн шинжлэх ухаан дотроо харьцангуй залуу гэдгийг илтгэнэ.