Элч Паул Дамаскийн ойролцоо Есүсийг харж, Түүнд итгэснээс хойш Ромын шоронд хоригдох хүртлээ гучин жил Ромын эзэнт гүрний нэлээд олон газраар Есүс Христийн элчин сайдын ёсоор аялжээ. Түүний хийсэн илгээлтийн гурван удаагийн аялалыг хүн бүхэн мэдэх агаад эдгээр аялалынхаа үеэр Паул сайн мэдээг тунхаглаж, Галат, Ази, Македони (Грекийн хойд хэсэг), Ахай (Грекийн өмнөд хэсэг) аймгуудад чуулган тарьжээ. Тэрээр аялал бүрийнхээ дараа тухайн газар үүсгэн байгуулсан чуулганыхаа хэвийн үйл ажиллагааг дэмжиж туслах зорилгоор захидал бичдэг байв. Тэдгээрийн нэг нь Галатчуудад бичсэн захидал бөгөөд олон хүн үүнийг Паулын бичсэн хамгийн анхны захидал гэж үздэг.