XXI зуун бол мэдээллийн тэсрэлтийн зуун. Тийм ч учраас хүмүүсийн мэдэх ёстой мэдээллийн хэмжээ эрс нэмэгдэж байна. Иймд цаг үеийн шаардлагад нийцэн, ажил амьдралдаа амжилт гаргахын тулд хүмүүст тавигдах тодорхой хэмжээний олон шаардлага байдаг. Эдгээр чухал шаардлагын нэг бол их хэмжээний мэдээллийг хурдан хүлээн авч, тогтоон боловсруулж сурах явдал юм. Хурдан хүлээж авахын тулд бид хурдан уншиж, түүнийхээ хэрээр сайн ойлгодог байх ёстой.

Миний бие 2002-2008 онд Турк улсын Анкара хотод хуульч мэргэжлээр суралцаж төгссөн билээ. Тухайн үед ихэвчлэн шалгалтаа дөхүүлж хичээлээ хийдэг байсан бөгөөд зарим үед шалгалтандаа холбогдох ном болон лекц материалыг уншиж амжилгүй ордог байлаа. Азаар уншсан сэдэв маань ирж аврагддаг байв. Тэгээд би богино хугацаанд маш их зүйлийг уншиж болох талаар сонирхож эхэлсэн бөгөөд улмаар сонирхол минь улам их нэмэгдсээр 2005 оноос эхлэн энэ асуудлыг судалж эхэлсэн билээ. Их хэмжээний ном, сурах бичиг цуглуулж, мөн сурсан зүйлээ бататгахын тулд сургалт семинарт хамрагдсан юм. Үүний үр дүнд нэг минутад унших үгийн тоо маань 1000-д хүрч, мөн ойлгоц маань 80 хувьтай гэсэн тооцоо гарсан. Ингэж эзэмшсэн чадвартаа тулгуурлан Турк улсын хурдан уншлагын аварга шалгаруулах шаталсан тэмцээнүүдэд оролцож тэнцсэнээр эцсийн шалгаруулалтад орох эрх авсан. 2008 оны 9 дүгээр сард болсон эцсийн шалгаруулалтад Туркын 17 хурдан уншигчтай Турк хэлээр уншиж өрсөлдсөнөөр 1 минутад 669 үг уншиж ойлгоц маань 70%-тайгаар мөнгөн медаль хүртсэн. Гадаад улсын иргэн Турк хэлээр ингэж хурдан уншиж байр эзэлсэнд сонин хэвлэлийнхэн болоод хүмүүс маш их сонирхож, баяр хүргэж байсан билээ.