Өнгөрсөн зууны ерээд оны зааг үеэс хойш олон улс гүрний дотоод гадаад байдалд болон дэлхийд тогтсон дэг ёсонд түүхэн хувьсгал гарч хорвоо ертөнц орвонгоороо өөрчлөгдсөн юм. Тэр үедээ социалист систем гэгчид хамрагдаж байсан улсуудад энэ өөрчлөлт өрнөсөн билээ. Социалист систем бүхэлдээ мөхсөн төдийгүй толгойлогч гол гүрэн ЗХУ тарж бутран, уг системийн улс төрийн болон худалдаа, эдийн засгийн гол тулгуур болж байсан Варшавын гэрээ, Эдийн засгийн харилцан туслах зөвлөл унав. Үүний цаана социализм, коммунизм байгуулах талаарх дэлхийн тэн хагаст түгэн алдаад байсан тулгуур үзэл номнол, үйл хэрэг түүхэн сорилт шалгалтыг даалгүй мөхсөн хэрэг байв.