Хувь заяаны цадиг роман нь зууны шилдэг романы 5 дугаарт шалгарсан хамгийн их сонирхол татсан бүтээл бөгөөд монголын уран зохиолын анхны таван дэвтэр мөн зохиолчийн анхны бүтээл гэдгээрээ онцлог юм. Зохиолч амьдралыг маш гярхай ажиглаж, өдөр тутмын эгэл жирийн явдлыг урнаар сэтгэн ер бусын болгон дүрсэлсэн нь анхаарал татдаг. Зохиолын үйл явдал үнэмшилтэй, хурц тод сэтгэлд буутал дүрсэлсэн нь зохиолчийн чадвар юм. Эл роман нь 1970-1980 оны үед нам төрөөс нийгмийн дэг журмыг сайжруулах, гэмт хэрэг зөрчилтэй эвлэршгүй тэмцэл явуулж буйг ойлгомжтой дүрсэлж төрсөн ах дүү Мянган, Донров хоёрын амьдралаас романы гол адал явдал эхэлж, улмаар МАХН-ын Төв Хорооны ерөнхий нарийн бичгийн дарга, АИХ-ын тэргүүлэгчдийн дарга, сайд, хурандаа, бага тушаалын офицер, малчин, ажилчин, үсчин, урлаг соёлын зүтгэлтэн, лам хувраг, шоронгийн хянагч гээд нийгмийн олон давхаргын хүмүүсийн амьдрал, үзэл бодол, ажил албыг өргөн цар хүрээтэй дүрсэлсэн байна.