Монгол ардын аман зохиолын яруу найргийн биеэ даасан төрөл зүйлийн нэг нь зүйр цэцэн үг юм. Зүйр цэцэн үгэнд ард түмний гүн ухаан, оюун сэтгэлгээ, аж төрөхүйн үзэл, ёс суртахуун, хэв заншлын хэм хэмжээг илтгэж, байгаль нийгмийн үзэгдлийг шинжлэн үзсэн байдаг. Зүйр цэцэн үг хүмүүний аж амьдрал, ажил хөдөлмөрийн туршлагыг нэгтгэсэн оюун бодролын шигшмэл цомнол учир түүнд хийсвэр санааны үүднээс хоосон цэцэрхэх зүйл огт үгүй, ямагт аж төрөхүй ёсны завсаргүй үнэнийг гарцаагүй голчоор хэлж, хорвоогийн өнгө нүүрийг таних, хүний амжиргаанд санаа сэхээ авахуулан сайныг дагаж, саарыг жигшүүлэх утга билгээр төгс болой.