Энэ удаа уншигч танаа монгол судлалын өгүүллийн эмхтгэлээ өргөн барьж байна. 1990 оноос хойш үндэсний ухамсар сэргэж эх түүхээ үнэнээр нь мэдэх эрмэлзэл, олон хүний сэтгэлийг эзэмдэж байсан үед Өвөрмонголын эрдэмтэн Сайшаал гуайн 'Чингис хааны товчоон' ном уншиж үлэмж бахдан хийсэн дүгнэлтийг нь өөрийн орны судалгааны бүтээлтэй харьцуулж Бөртөчоно, Гоомарал хоёрын талаар бичихээр шийдэж арав гаруй түүхийн сурвалж бичиг, судалгааны өгүүлэл уншиж бичсэн 'Бөртө чоно, Гоо марал хоёр түүхэн хүн' өгүүллийг минь 'Засгийн газрын мэдээ' сонины хавсралт 'Ням гариг' сонины 1996 оны 7 дугаар сарын 14-ний 28 дугаарт 'Эрэл' буланд нийтэлсэн билээ. Энэ нь миний Монголын нууц товчоо', 'Чингис хаан судлал'-ын анхны өгүүлэл байсан юм.