Шүлэг бол байшин юм. Газраа зөв олох хэрэгтэй. Усны аман дээр барьчихвал нэг үерт урсаад явчихна. Салхины аман дээр баривал хийснэ. Хийсэхгүй ч гэсэн жавар нь хүн тогтох аргагүй хүйтэн байна. Суурий нь зөв тавих хэрэгтэй. Ханы нь тэгш өрөх хэрэггэй. Цонхы нь том хийх хэрэгтэй. Олон тийшээ харах цонхтой байхаас гадна, бороо дусахгүй, өндер тагттай их сайхан байшин хэрэгтэй. Шүлэг бол хүлэг юм. Уяа сойлгы нь зөв тааруулах хэрэгтэй. Унах хүүхдий нь зөв олох хэрэгтэй. Хүүхэд нь хүндэдвэл амархан ядарна. Хүүхэд нь гэнэдвэл хүлгийн давхианд бас саад болно. Дорнын их найрагч Б.Явуухулан 'Хүлэг минь, шүлэг чи бид хоёрт дэлхийн дэвжээ хэрэгтэй' гэж хэлсэн байдаг. Шүлэг бол гал юм. Зөв ноцоох хэрэгтэй. Учир зүггүй түлээд байвал түймэр тавьж мэднэ. Хэт болгоомжлоод байвал унтарч мэднэ. Тиймээс сайхан орчин хэрэгтэй. Урт болохоор яруу найраг, богино болохоор шүлэг гэж ойлгож болохгүй. Урт мөртлөө авах юмгүй усан шүлэг зөндөө байдаг, богино мөртлөө болорын талст нь гялтагнасан жинхэнэ яруу найраг байж болно.