1971 онд Архангай аймгийн Тариат сумын 10-н жилийн дунд сургууль, 1976 онд МУИС-ийн физикийн анги төгссөн. 1976-1984 онд МУИС-д багш, 1984-1991 онд ОХУ-ын Дубна хот дахь Цөмийн ШинжилгээниЙ Нэгдсэн Институт (ЦШНИ)-д эрдэм шинжилгээний ажилтнаар, 1991-2005 онд МУИС-ийн Физикийн факультетэд багш, физикийн тэнхимийн эрхлэгч, деканаар, 2005-2009 онд ШУА-ийн Физик, технологийн хүрээлэнгийн захирлаар, 2009-2013 онд ЦШНИ -ийн лабораторийн эрдэм шинжилгээ эрхэлсэн дэд захирлаар, 2013 оны III сараас ШУА-ийн ФТХ-ийн салбарын эрхлэгч, Цацрагийн физикийн лабораторийн эрхлэгч, 'Нано хэмжээст материалын судалгаа' сэдэвт ажлын удирдагчаар ажиллаж байна. 1990 онд Москвагийн их сургуулийн Физикийн факультетэд физик-математикийн ухааны дэд эрдэмтний зэргийг, 2002 онд Монгол Улсын Шинжлэх ухааны академид физик-математикийн шинжлэх ухааны докторын зэргийг хамгаалж, 2004 онд МУИС-ийн профессор цол хүртсэн. Профессор Д.Сангаа эрдэм шинжилгээнийхээ ажлын үр дүнгээр 200 гаруй өгүүлэл бичиж дотоод, гадаадын эрдмийн бүтээлүүдэд хэвлүүлсэн төдийгүй 'Материал судлал', 'Бодисын нанобүтэц', 'Наноматериалын судалгааны нейтрон сарнилын аргууд' зэрэг сурах бичиг, 'Физикийн тулгуур нээлтүүд ба Нобелийн шагналтнууд' зэрэг шинжлэх ухаан, танин мэдэхүйн 20 шахам ном, гарын авлага бичиж хэвлүүлсэн байна. Профессор Д.Сангаа нь 1993-1998, 2008-2011 онуудад ЦШНИ-ийн Эрдмийн зөвлөлийн гишүүн, 1994-2004 онд Физик, математикийн ухаанаар эрдмийн зэрэг хамгаалуулах зөвлөлийн гишүүн, 2000-2005 онд Олон улсын физикийн олимпиадын хорооны гишүүн, 2002 оноос Азийн кристаллографийн холбооны гишүүн, ШУА-ийн Бага чуулганы гишүүн, 2006-2011 онд Монгол Улсын Цөмийн энергийн комиссын гишүүнээр сонгогдон ажиллаж байсан. Английн Резорфордын нэрэмжит Нейтроны сарнилын төв, ХБНГУ-ын Дармштадтын Технологийн их сургууль, ХБНГУ-ын Берлиний Нейтрон сарнилын хүрээлэн, Франц улсын Ле Мансын их сургууль, Польш улсын Познань хотын их сургууль, Чех улсын ШУА-ийн Физикийн хүрээлэн, Тайвань улсын Синрхотроны судалгааны төв зэрэг олон эрдэм шинжилгээний төвүүдэд ажллаж ирсэн эрдэмтэн багш билээ.

Дундговь аймгийн Луус (одоогийн Хулд) сумын нутагт төрсөн. МУИС-ийн Физик Математикийн Факультетийн физикийн ангид суралцан Агаар мандлын физикийн ухаанаар мэргэжил эзэмшээд (1971) сургуульдаа багшаар үлдэн ажиллаж, улмаар БНБАУ-д Физик-математикийн ухааны доктор (Рh.D)-ын зэрэг хамгаалсан бөгөөд 1989 онд доцент, 1997 онд профессор цол хүртжээ. Профессор Н.Түгжсүрэн 1971 оноос өнөөг хүртэл их, дээд сургуульд тасралтгүй багшилж ирсний зэрэгцээ 2003-2004 онд Япон Улсын Чибагийн Их Сургуулийн Агаар мандлын физикийн салбарт зочин профессороор уригдан ажиллажээ. Тэрээр хамтарсан болоод дангаар их, дээд сургуулийн оюутнуудад зориулсан сурах бичиг, гарын авлага, танин мэдэхүйн ном 60 гаруйг туурвисан болоод хянан нягталж, эрдэм шинжилгээнийхээ ажлын үр дүнгээр 200 гаруй өгүүлэл дангаараа болоод хамтран бичиж гадаад, дотоодын эрдмийн төрөлжсөн бүтээлүүдэд хэвлүүлсний гадна физик, одон орны ухааны ололт амжилт, шинэ нээлт бүтээлийн талаар олон түмэнд сурталчилсан танин мэдэхүйн өгүүлэл 300 гаруйг бичиж 'Шинжлэх ухаан, амьдрал', 'Шинжлэх ухаан танин мэдэхүй', 'Шинжлэх ухаан, технологи', 'Залуу үе', 'Ухуулагч' зэрэг сэтгүүл, төвийн олон сонинд нийтлүүлжээ. Түүний дангаар болон хамтран бичсэн 'Уудам орчлон, ухаант амьдрал', 'Орчлонгийн тогтоц', 'Уудам орчлонд нутаг үзэхүй', 'Хүүхэд залуучуудын нэвтэрхий толь- III', 'Альберт Эйнштейн', 'Танин мэдэхүйн нэвтэрхий толь', 'Астроном' нэвтэрхий толь, 'Шинжлэх ухааны нээлт' зэрэг номууд өргөн олны хүртээл болоод байна. Профессор Н.Түгжсүрэн Монголын Инженерийн Ухааны Үндэсний Академийн гишүүн, Шинжлэх Ухаан, Технологийн Их Сургуулийн Эрдмийн зөвлөл, докторын зэрэг хамгаалуулах хорооны гишүүн, Монголын физикийн нийгэмлэг, Улсын физикийн олимпиадын хорооны гишүүн, Физикийн багш нарын холбооны удирдах зөвлөлийн гишүүнээр ажиллаж ирсэн бөгөөд Монголчуудын намтрын товчоон (Who's who in Mongolia) номд бичигдсэн эрдэмтэн багш юм.