Соёл бол хэл сэтгэлгээний нэгэн адил монгол үндэстний оршихуйн дархлаа мөн. Энэ үйлсийг туурвигч түүх соёлын дурсгалыг цуглуулагчдын нэг А.Алтангэрэл бие, хэл, сэтгэлийн үр бүхэн нэвт шингэсэн, эх орондоо төдийгүй, Ази, дэлхий дахины цуглуулагчдын сонорыг мялааж, нүд хужирлам энэ сайхан цуглуулгыг өөрөө ангилан судалж, тайлбар зүүлт хадан, мэргэжилтэн нөхөдтэй хүч хавсран уг цомгийг туурвисан нь түмэн олныхоо гоо сайхны мэлмийг нээгдүүлж, сэтгэлийн хав цэнгэл эдлүүлэхүйц сайхан бүтээл болжээ. Цуглуулагч А.Алтангэрэлийн цуглуулгын зөвхөн нэгээхэн дээжис багтсан энэ номыг тоймлон үзвээс юуны урьд монголын түүх соёл, бурхан шашины урлаг, түүний дотор нутаг нуга бүхний найруулга тухайлбал Дарьганга, Далайчойнхор, Ноён Сэврээ, Буриад, Арчуул гээд бүхий л хийцийн алт мөнгөний урлагийн үнэт эрдэнэс бүтээл, мод хээлэх сийлэх, арьс шир, нэхмэл хатгамал, зээгт наамлын урлаг, монгол үндэстний уран зургийн олдохуйяа бэрх ховор нандин дурсгалууд багтжээ.