Энэ зохиолд Баруун монголчуудын түүх, угсаатны зүй судлах 'Алтай' төслийн хүрээнд 1996-1998 онд Ховд, Увс, Баян-Өлгий аймагт хийсэн угсаатны зүйн хээрийн шинжилгээгээр цуглуулсан хэрэглэгдэхүүнийг гол эх сурвалж болгожээ. Уг ажил нь алтайн урианхай, баяд, дөрвөд, захчин, мянгад, өөлд, торгууд, хошууд зэрэг ойрад монголчуудын хуримын зан үйлийн хэрэглэгдэхүүнийг судалгааны эргэлтэд оруулснаараа нийт монгол угсаатны хуримын зан үйлийг харьцуулан судлахад ямар нэгэн хэмжээгээр дөхөм үзүүлэх, их сургууль, коллежийн угсаатны зүйн сургалтад ашиглах, залуу үеийг зан үйлийн уламжлалтай танилцахад тус дөхөм болно хэмээн найдаж байна.