Хоёр мянгаад оноос эхэлсэн блог талбарууд улам бүр олширсоор бичих дуртай, бичиж үзэх юм сан гэж боддог хүн бүр хорхойгоо дарах боломжтой болсон билээ. Блог гэдэг нь хүссэн хүн бүр олон нийтэд зориулсан талбар нээгээд юу дуртайгаа, аливаа хэлбэрт баригдахгүйгээр бичихийг хэлдэг. Монголын блогчид ч дэлхий нийттэй хөл нийлүүлэн алхаж, дотоодын banjig, gogo.mn, blog.mn зэрэг өөрсдийн блог платформуудаа идэвхтэй хөгжүүлж байв. Олон ч алдарт блогчид төрөн гарсан. Харин дэлхийн хамгийн алдартай, өргөн хүрээний сошиал талбар болох фейсбүүк төрөн гарснаар блогийн эрин үе дууссан юм. Монголын блогийн хөгжлийн оргил үеийг гэрчлэх энэхүү түүвэр нь Артаньян нэрээр бичдэг байсан Д.Түмэн-Өлзийн 2007–2010 оны блог бичвэрүүдийг багтаасан сонирхолтой бүтээл юм. Блог гэдэг нь тухайн үед хүссэн хүн бүр үзэл бодлоо хуваалцаж, аливаа хэлбэрт баригдалгүй бичих боломж олгодог нээлттэй талбар байсан бөгөөд энэ түүвэр нь тэр цаг үеийн сэтгэлгээний өнгө, нийгмийн аяс, хувь хүний эргэцүүллийг илэрхийлдэг.