Сан Донатогийн гуравдугаар үеийн ван Елим Павлович Демидов Кавказаар явж байхдаа Английн нэрт анчин Сент-Жорж З.Литтлдэйлтэй танилцаж, андын холбоо тогтоосон нь 1897 онд Монгол Алтайд угалзын анд хамт явахад хүргэж, улмаар тэрхүү аяллын тухай онц сонирхолтой тэмдэглэлээ Rowland Ward хэвлэлийн газарт 1900 онд хэвлүүлжээ. Энэ номын 'After wild sheep in the Altai and Mongolia' хэмээх эх зохиолыг Kessinger Publishing хэвлэлийн газар дахин хэвлэсэн ба уг хувилбарыг орчуулагч Н.Даваадорж amazon.com-оос 2006 онд захиалан авч орчуулан уншигч авхай танд өргөн барьж байна. Энэ номыг уншсан гадаадын зэрлэг хонины анчин бүрийн мөрөөдөл нь Монгол явж, Алтайн уулсад байх Аргаль угалз агнаж, ангийн олзвор болох эврийн төлөө юугаа ч өгөхөөс буцахгүй байсан боловч тухайн үеийн улс төрийн байдлаас болж тэдэнд Монголд ирж, угалзын ан хийнэ гэдэг нь 1960-аад оны дунд хүртэл бүтэшгүй зүйл байсан билээ. Харин 1966 онд George H.Landerth хэмээх газрын тосны инженер Говьд ирж угалз агнах зөвшөөрөл авснаас хойш зэрлэг хонины нэрт ангуучид болох Herb Klein, Elgin Gates, Frank Hibben, Weir McDonald нар Монголд ирж угалзын ан хийжээ.