Оньсого, таавар бол зүйр цэцэн үг, хэл зүгшрүүлэх үгсийн нэгэн адил аман зохиолын жижиг төрөл зүйлд хамаарагддаг. Гэвч оньсого таавар нь жижиг төрөл зүйлийн дотроос өргөн дэлгэр утга агуулга, баялаг зохиомж, уран дүрслэлтэйн хувьд аман зохиол судлалд томоохон байр эзэлдэг байна. Ард түмэн зүйр цэцэн үгийг үг яриандаа нотолгоо, чимэг юм уу, сургамж болгон хэрэглэдэг бол оньсого, тааврыг гэр бүл, сургуулийн хүрээнд ялангуяа хүүхдийн оюун ухааны хүмүүжлийн танин мэдэх, бодож сэтгэх 'хичээл' болгон ашигласаар иржээ. Уг бүтээлд монгол ардын оньсого тааврын тухай жишээ, тайлбартайгаар дэлгэрэнгүй өгүүлээд номонд орсон нийт оньсогыг Сансар, гариг ертөнц, түүний үзэгдлийн тухай оньсого, Амьд байгалийн тухай оньсого, Амьтны аймгийн тухай оньсого, Хүний амьдрал, үйл ажиллагаа, эдлэл хэрэглэлийн тухай оньсого гэсэн 4 бүлэгт хуваан оруулаад 80 гаруй тааврыг хариуны хамт V бүлэгт нэмж оруулсан байна.