Шар айраг хүн төрөлхтний хамгийн гайхамшигтай бүтээлүүдийн нэг юм. Түүнийг дэлхий даяар үйлдвэрлэн, хүсэл тэмүүлэлтэйгээр хэрэглэж байна. Шар айраг хүмүүсийн хооронд найрсаг харьцааг бий болгож, амьдралын баяр баясгалан нэмдэг бөгөөд бүхнээс илүү нь онцгой сайхан амттай байдагт оршино. Түүнийг зохистой хэрэглэх нь хүний эрүүл мэнд, бие махбодь болон оюун санаанд эерэгээр нөлөөлдгийг хамгийн ноцтой шүүмжлэгчид ч үгүйсгэж чаддаггүй билээ. Согтууруулах ундаанууд дотроо шар айраг нь алкоголийн агууламж, найрлага дахь бодисууд болон цэвэр байдлаараа хүний биед хамгийн аюул багатайд тооцогддог. Энэхүү ном нь шар айргийн технологийн чиглэлээр их, дээд болон тусгай дунд сургуульд суралцагсдад зориулсан мэргэжлийн сурах бичгийн хэлбэрээр бичигдсэн бөгөөд мөн энэ салбарт ажиллагсад, багш судлаачид, цаашлаад сонирхогч хэн бүхэн ашиглах боломжтой юм. Ном нийт 25 бүлэгтэй ба шар айргийн түүхий эдээс эхлээд түгээлт хүртэлх үйлдвэрлэлийн бүхий л үе шатуудыг багтаасан болно. Мөн үйлдвэрлэлд хэрэглэгддэг туслах материалууд, тоног төхөөрөмж, багаж хэрэгслүүдийн талаарх дэлгэрэнгүй мэдээлэл болон шар айргийн үйлдвэрлэлийн технологийн анхны сонгодог загвараас авахуулаад орчин үеийн дэвшилтэт шийдлүүдийн бүхий л хувилбаруудыг энд багтаахыг хичээсэн байна. Мөн бүлэг сэдэв бүрт харгалзах үйлдвэрлэлийн технологи, үйл явцыг харуулсан зураг, график, схем, хүснэгтүүдийг дэлгэрэнгүй тайлбартайгаар оруулжээ.