Монгол

Эрхэм уншигч авхай танд Монголын түүхийн нэгэн чухал сурвалжийг орчуулан хүргэж байна. Францын Вангийн өргөөнөө эрдэм мэдлэгээрээ гайхагдсан эцэг хүү хоёр Пети де ла Круа байжээ. Эцэг нь Францын Вангийн шадар түшмэл, араб, түрэг хэлний орчуулагч нь байж. 1695 онд бие барахдаа ажил үүргээ хүүдээ өвлүүлэн үлдээсэн байна. Хүү нь мөн л алдартай дорно дахины судлаач болж, олон орноор аялан, араб, перс, түрэг хэлэнд сайтар боловсорч, сурвалж бичиг орчуулснаас гадна өөрөө ч туурвижээ. Толилуулан буй энэхүү номыг үндсэндээ эцэг Пети де ла Круа арван жилийн турш бичсэн бөгөөд хүү нь хожим хянан тохиолдуулж, хавсралт сэлтийг нэмэн дуусгасан байна. Юуны өмнө Пети де ла Круа нь дорнын 53, Өрнийн 50 түүхч, зохиолчийн ном бүтээлийг уншин судалж байж номоо бичсэн юм. Уг номонд XII-XIII зууны Монголын түүхийн талаар манай түүхэн эх сурвалжуудад ч дурсагдаагүй шахуу орхигдсон он жилүүд, түүхэн үйл явдлуудын талаар машид дэлгэрэнгүй тусгагдсан нь Монголын болон олон орны түүх судлаачдын хувьд нэгэн шинэ хуудсыг нээж байна.  