Төмрөөр урлах ухаан нь Төв азийн нутагт олон зууны туршид оршин амьдарч ирсэн манай ард түмний бүтээсэн оюуны болон эд өлгийн соёлын нэг юм. Төмөр урлал нь тухайн нийгмийн хөгжилт, хэрэгцээ шаардлага, ард түмний гоо сайхны таашаал сонирхолтой уялдан хөгжиж иржээ. Монгол урчууд төмөрлөгийг таньж мэдсэнээр хатаах, өнгөлөх, арвижуулах, ширээх, хайлах, бордох зэрэг олон аргыг эзэмшин боловсруулж ирсэн байна. Монгол нутагт хүрлийн үеэс дархны урлаг хөгжсөн бөгөөд хийдэг зүйл нь зэвсгийн зүйлээс хутга, жад, сүх, дуулга, бамбай, нум сумны зэв, бороохой байжээ. Зэр зэвсгээс гадна ахуйн хэрэглээний зүйлс хүрэл тогоо, сав суулга, морины тоног хэрэгсэл, эрэгтэй эмэгтэй хүний хувцас, бүсний чимэглэл, гоёлын ээмэг, бөгж, зүүлт зэрэг олон төрлийн зүйлс байдаг. Энэхүү цомогт ихэнхидээ ард түмний ахуй амьдралд хэрэглэгдэхгүй болж байгаа уламжлалт ган төмөр урлалын зүйлсийг сурвалжлан оруулж хойч үе, залуучууддаа өргөн барьж байна.