Сүүлийн үед архи тамхины хэт их хэрэглээ, буруу хооллолт, хөдөлгөөний дутагдлаас болж нийгэмд элэгний өвчлөл ихсэх хандлагатай болжээ. Элэгний эсүүд үхэхэд орон зай нь өөр төрлийн эд эсээр бөглөгддөг тул элэгний өвчин удаан үргэлжлэх тутам тэр орон зайд өөр эд урган сорвиждог байна. Үүнийг _цирроз_ гэдэг. Манайхан заримдаа “элэг хатуурах” ч гэлцдэг. Гепатитын архаг үрэвслээс болж мөн элэг хатуурч түүнээс үүдэн элэгний хорт хавдар үүсдэг. Өөрөөр хэлбэл, элэгний гэмтсэн эсийн орон зайд шинэ эс ургаж нөхөн сэргээлт явагдагдахад гэнэт нэг эс хяналтгүй олширч хорт хавдрын эх тавигддаг байна. Гэхдээ хорт хавдрыг цаг тухайд нь зөв оношилбол 80-90% бүрэн эдгэрдэг ажээ. Уг товхимолд элэгний вирус, элэгний хорт хавдар, хүнсний аюулгүй байдал, аливаа өвчнөөс урьдчилан сэргийлэх уламжлалт арга, хэрэглэх эмүүд, эрүүл биеийг хэрхэн чийрэгжүүлэх талаар дэлгэрэнгүй бичжээ.