Алфред Адлерийг өөд болохоос арван жилийн өмнө Бодгаль Сэтгэл Судлалын үндсэн зарчим ойлголтуудыг багтаасан “Амьдралын тухай шинжлэх ухаан” ном 1927 онд анх удаагаа англи хэл дээр хэвлэгдэж байжээ. Энэхүү ном нь онолын үзэл санааг маш олон жишээ баримтуудаар тайлбарлаж өгсөн учир Адлерийн арга зүйг дэмждэг судлаачдад гарцаагүй сонирхолтой байх болно. Уг ном нь тэр чигтээ нийгэмших хэрэгцээний тухай, мөн түүнийг эзэмшиж буй явдлын тухай бөгөөд бидний хичээл зүтгэл ямар ч байсан хаашаа ч хамаагүй сайн сайхан байдал руу тэмүүлж чадахыг энэ бүтээлээс олж харах юм. Уншигч та энэхүү номноос Адлерийн гаргаж ирсэн онолд нийтлэгийн мэдрэмж (нийгмийн сонирхол) хэр зэрэг чухал үүрэгтэй вэ? гэдгийг ойлгох болно. Тэрээр сэтгэл судлалынхаа лекцээ уншиж дуусгах бүрт ирэх асуултуудад бүх зүйл нийтлэгийн мэдрэмжтэй холбоотой гэдэг байв. Мөн “ямар нэгэн зүйл буруу байвал нийтлэгийн мэдрэмжтэй холбоотой” хэмээн хариулдаг байжээ. Адлер бол уран илтгэгч, гайхалтай сайхан ярьдагаараа алдартай байсан. Харамсалтай нь зөв системтэй бичдэг зохиолч байгаагүй. Хэдий тийм ч түүний лекцийн өөрийх нь болон бусад хүмүүсийн бичиж үлдээсэн тэмдэглэлүүдийн цуглуулгыг эмхэтгэж өөр бусдын гараар бичсэн түүний нэртэй ном болгон хэвлүүлсэн нь үнэн билээ.