Манай нэрт хүн ам зүйч, эрдэмтэн Ойдовын Сүхбаатар гуай бид нэлээд эртний танил. Түүний эхнэр Д.Должинсүрэн Монгол Улсын Их Сургууль (МУИС)-ийн Нийгмийн ухааны факультетэд олон жил надтай хамт ажилласан. Тэрбээр Сэтгэл судлалын тэнхимийн туслах ажилтан байсан билээ. 1997 онд намайг МУИС-д дахин ажиллаж, Түүхийн тэнхимийн эрхлэгчээр томилогдоход Сүхбаатар гуайн охин Энхжин надад шавь орж, мэргэн сайд А.Амарын амьдрал, үйл ажиллагааны талаар судалгаа хийхээр зориг шулуудан ажилласан юм. Бодвол аав, ээж нь Болдбаатарт шавь орох нь зүйтэй хэмээн охиндоо зөвлөсөн байх. Ингэж С.Энхжин бид хоёр багш, шавийн барилдлагатай болсон юм. Тэрбээр оюутан, докторант байхын хянуур, нягт нямбай, идэвх оролдлого сайтай, ухаалаг охин байв.