Одоо цагт нийгмийн амьдралын нийтийн хүрээг улс төрийн ертөнцийн гол цөм болгож тавихын тулд юуны өмнө философийг өөрийг нь, түүний дотор улс төрийн философийг өөрчлөн шинэчлэх хэрэгтэй болж байна. Философи бол хамгийн ерөнхий, түгээмлийг ойлгож, тайлбарладаг ухаан. Монголын нийгмийн хувьд нийтийн хүрээ үүсч бүрэлдэх, хөгжих нь хөрөнгөт нийгмийг байгуулж, хотожсон, иргэний нийгэм нэгэнт бүрэлдсэн улс орнуудынхаас эрс өөр өвөрмөц онцлогтой бөгөөд том гэр бүлийн (ойкос) хүрээнд анхлан үүсч, хөгжиж ирсэн уламжлалтай. Нийтийн хүрээ бодит баримт дээр суурилдаг боловч зөвхөн тоон өгөгдөхүүн биш, харин хамтын шийдвэр шаардагдаж буй асуудал дэвшин гардаг талбар юм. Нийтийн хүчин чармайлтыг нэгтгэх нь хүмүүс нэгдмэл нэг ойлголттой болох, өөриймшөл нь нийтлэг байх буюу тэд юу хүсч байгаагаа болон юуг хүсэхгүй байгаагаа ухамсарласан үед л бий болох боломжтой юм.