Хүний орчлонгийн таван суут хүний нэг болсон Бурхан багшийн үеийн нанхиадын Күн багш буюу Күн зы мэргэн гэгч 'Биеэ засаад, гэрээ зас, гэрээ засаад, төрөө зас' гэсэн нь аль Киданы үеэс монгол хүний чихэнд хоногшсоор өдий хүрсэн юм гэх ба санаа нь нэг л биш. Тэгэхлээр ямарваа айл өрх өөрсдийн нөмөр нөөлөг, халх цайз болох учиртай орон гэрээ ёсоор нь цоцлуулж чадваас сав, шимийн ертөнцийн шүтэлцээ найрсаад бие, сэтгэлийг сэвтээх юмгүй болж, аж төрөл амаржин тууширч, амар амгалан ноёрхоно. Энэ ямар учиртай хэрэг вэ гэвэл ахуй анхдагч, сэтгэл хоёрдогч болдгийн гэрч. Нээрээ л Күнз авхай тэгж айлдсан нь үнэн юм бол үнэн ба амьдралд таарахаа байжээ. Тийм болохлоор эхлээд гэр орноо чухалчлах нь эрхэм. Эрдэнэт хүний биеийг олж төрчихөөд, энэ орчлонд ёс төртэй, амар амгалан аж төрөхийг хүсвээс гэрээ засаад, биеэ засагтун. Гэр гэж явцуу утгаараа бидний орон байр. Дэлгэр утгаараа сум, аймаг, хот, нийслэл, эх орон, тив дэлхий минь. Эл товхимол тэр л заслын тухай үгүүлнэ.