Банкны систем тогтвортой байж эдийн засгийн хөгжил дэвшилд нэг тулах хүч болж байхын тулд маш сайн менежмент хэрэгтэй. Удирдлага зөв оновчтой, цаг үеэ олсон шийдвэр гаргах нэг үндэс нь бодитой үнэн мэдээллээр хангагдах явдал юм. Ийм мэдээллийг судалгаа шинжилгээ хяналт шалгалтын үр дүнд олж авна. Их, дээд сургуулийн банкны эдийн засаг, нягтлан бодох бүртгэлийн мэргэжлийн бакалаврын сургалтын хөтөлбөрт тусгагдсан 'Банкны хяналт, шинжилгээ' хичээлийн хөтөлбөртэй уялдуулан энэ суралцах бичгийг банкны салбарт боловсон хүчин бэлтгэхэд хүч оюунаа зориулж яваа МУИС-ийн Эдийн засгийн болон Худалдаа үйлдвэрлэлийн сургуулийн багш нар зохион бичжээ. Номын нэгдүгээр бүлэгт хяналт шалгалтын онол арга зүй, дотоод хяналт шалгалтын удирдлага зохион байгуулалтын асуудлыг, хоёрдугаар бүлэгт зайнаас тавих хяналт шалгалт буюу шинжилгээ хийх арга зүйг, гуравдугаар бүлэгт газар дээрхи хяналт шалгалтын агуулга аргыг, дөрөвдүгээр бүлэгт Төв банкны хяналт шалгалтын зохион байгуулалт, агуулга, арга зүйн асуудлуудыг тус тус тусгасан байна.