МУИС-ийн Хууль зүйн сургуулийн багш, хууль зүйн ухааны доктор (Ph.D), профессор Г.Баярхүү Монголын эртний цааз хууль, хэв ёс, зан заншлын хэм хэмжээг харьцуулахдаа бичмэл хуулиудыг он цагийн дарааллаар авч судлан, зан заншлын уламжлал, залгамж, хөгжлийн асуудлыг үечлэн авч үзжээ. Мөн зарим зүйлийг ойлгоход дөхөмтэй болгох үүднээс схем (бүдүүвч), хавсралт, тайлбар, дүгнэлт зэргийг үйлдэн хавсаргажээ. Уг асуудлыг авч үзсэнээр, монголчуудын төр, ёс, хууль дээдлэх үзэл шинэчлэгдэх явцад хууль цааз, заншлын хэм хэмжээний уламжлалыг өөрийн орны өвөрмөц нөхцөл байдалд тулгуурлан хөгжүүлэх Монголын хууль зүйн шинжлэх ухааны нэг зорилтыг хэрэгжүүлэхэд чухал үүрэг гүйцэтгэх юм. Энэхүү нэгэн сэдэвт зохиолын хүрээ нь Хүннү гүрэн болон Монголын нэгдсэн төр үүний дараах үеийн нийгмийн улс төрийн болон эрх зүйн системийг хамарч байгаа ч зөвхөн хууль цааз, зан заншлын хэм хэмжээний эх сурвалж болох гол хуулиудад задлан шинжилгээ хийж нэгтгэн дүгнэхийг зорьсон байна.