Олон оронд эмэгтэйчүүдийн хөдөлмөрийг маш доогуур үнэлдэг ч нийгэмд эзлэх эмэгтэйчүүдийн үүрэг өөрчлөгдсөн. Үүнийг сүүлийн хагас зуун жилийн хугацаанд төрийн өндөр дээд албан тушаалд суух эмэгтэйчүүдийн тоо өсөж байгаатай холбож болно. Хэдийгээр тэдний улс төрийн ертөнцөд эзлэх хувь хэмжээ тун бага ч ажил, амжилт, үйл хэргээрээ хойч үеийн бүсгүйчүүдэд үлгэр дууриал болох эмэгтэйчүүдийн бодит жишээ нэмэгдсээр байгаа билээ. Эрчүүдийн нэгэн адил эмэгтэйчүүд эрх мэдлийн амтыг мэдэрч, үүргээ хэрэгжүүлэхийг хүсдэг. Тэд эрх мэдлийг гартаа оруулах чадвартайгаас гадна өөрийн болон бусдын амьдралыг өөрчлөх хүсэл зориг, авьяасдаа бүрэн төгс итгэцгээдэг. Хэдийгээр тодорхой албан тушаал хашдаггүй байсан ч нийт америкчууд, тэр дундаа зүүнтнүүд, феминист үзэлтнүүдийн хүндэтгэлийг хүлээсэн АНУ-ын тэргүүн хатагтай асан Элеонора Рузвельт нэгэнтээ 'Эмэгтэй хүн дүрдэг цайны нимгэн уут л гэсэн үг. Түүний ямар бат бөх, тэсвэртэй болохыг буцалсан усанд дүртлээ хэн ч тааварлаж мэдэхгүй' хэмээж байжээ.