Уран барилгын чимэглэл нь дүрслэх урлагийн олон төрөл зүйлээс бүрдсэн цогц шинжийг хадгалан барилга байгууламжийн утга санаанд нийцсэн уран сайхны шийдэлт, агуулга, онцлогтой хөгжиж ирсэн бөгөөд холоос харах орон зайтай, сүрлэг томруун байх зэрэг өөрийн гэсэн өвөрмөц шийдэлтэй байдаг. Монгол урчууд эрт дээр цагаас барилгын дээвэр, туурга, багана, хаалга зэргийг будаж хээлэхдээ үндэсний уламжлалт хээ угалзтай төгс хослуулж байжээ. Харин орчин цагийн монголын уран барилга нь социализмын үед Европ, Орос загварын байшин барилгаар өргөжин хөгжсөний зэрэгцээ манай урчууд Монгол улсын Төрийн ордон, Их Тэнгэрийн харш, Хуримын ордон, Байгалийн түүхийн музей, Дуурь бүжгийн эрдмийн театр зэрэг зарим барилгын гадаад, дотоод чимэглэлд үндэсний хэв маяг, онцлогийг тусгасан хээ угалзаар чимэх болсон юм.