Г.Сэр-Одын нэрэмжит шагналт, сэтгүүлч, яруу найрагч Б.Төгсжаргал аавынхаа (МЗЭ-ийн болон Сэтгүүлчдийн нэгдсэн эвлэлийн шагналт, сэтгүүлч, яруу найрагч Ишийн Батсүх) үзгийг барьж үйлсийг нь үргэлжлүүлэн аавынхаа нэрэмжит ном соёл, утга зохиолыг дэмжих 'Номын ертөнц' сан байгуулан олон соён гэгээрүүлэх ажил зохион байгуулж, аавынхаа номын садан, нэрт яруу найрагч Д.Нямсүрэнгийн 'Хаврын урсгал', МУСГЗ Го.Аким гуайн 'Тэнгэрийн нохой', МУСГЗ Ц.Базаррагчаагийн 'Нохойн дуун', МЗЭ-ийн шагналт яруу найрагч Б.Баттулгын 'Туурвиагүй цагийн эгшиглэн' зэрэг 10 гаруй номуудыг эрхлэн хэвлүүлсэн байна. Энэ удаад 2008 онд хэвлэгдэж байсан аавынхаа уран бүтээл, шүлэг найраг, дурдатгал бүхий 'Сэтгэлд уянгалах яруухан хөгжим шиг' номыг нь нэмж засварлан, олон сайхан дурсамж, үйл явдлуудаар баяжуулан 'Хүн уул' нэртэйгээр эрхэм уншигч та бүхэнд хүргэж байна.